Panairi Punës – Durrës 2012, 1 459 kërkesa për 830 vende të lira pune

Tuesday, 10 July 2012 16:24

Një javë më parë në Pallatin e Sportit "Ramazan Njala" në Durrës u organizua Panairi i Punësimit – Durrës 2012.
Në Panairin e organizuar nga Drejtoria Rajonale e Punësimit Durrës morën pjese 47 biznese që zhvillojne aktivitete të ndryshme ekonomike në Durrës, të cilat reklamuan 850 vende të lira pune.
Panairi u përshëndet nga Zv/Ministrja e Punës, Çështjeve Sociale dhe Shanseve të Barabarta, Znj. Filloreta Kodra, e cila theksoi se panairet e punës janë mënyra dhe rruga më e shpejtë dhe e drejtëpërdrejtë për të sjellë sa më pranë kërkesën me ofertën ne tregun të punës. “Edhe pse organizimi i panaireve të punës në rajonet më të mëdha të vendit është një risi e viteve të fundit për politikat aktive të tregut të punës në Shqipëri, tashmë ato janë kthyer në evente të përvitshme dhe tepër rezultative”, vuri në dukje znj.Kodra.
Dejana Burgija, Drejtore e Zyres Rajonale te Punesimit Durrës bëri një prezantim të situatës në tregun e punës për këtë rajon, duke vënë në dukje se Rajoni i Durrësit është një rajon me tregues pozitiv në fushën e punësimit dhe domethenes për këtë është edhe niveli i papunësisë i cili arrin në 9,8%, shumë më e ulët nga niveli i papunësië në shkallë vendi i cili arrin në 13.28%. Zipas znj.Burgija kjo ka ardhur si pasojë e zhillimit që ka marrë biznesi dhe investimet në këtë zonë si dhe marrëdhënieve të bashkëpunimit që ka krijuar zyra e punës me to.

Të pranishëm në çeljen e Panairit ishin edhe Prefekti i Qarkut Durrës Z.Genci Alizoti, Kryetarja e Qarkut Durrës Znj.Eglantina Begteshi, Kryetari i Dhomës së Tregëtisë Z.Andrea Xhavara, si dhe përfaqësues të bizneseve, institucioneve shtetërore si dhe një numër i madh të papunësh të interesuar për t’u intervistuar.
Për 850 vendet e lira të punës së prezantuara në Panair u paraqitën 1 459 kërkesa nga individë të interesuar të cilët nuk e kanë një punë apo dëshirojnë ta ndryshojnë atë.
Në vazhdimësi Zyra e Punës në Durrës do të bashkëpunojë me biznesin për plotësimin e vendeve të lira të punës me personelin më të kualifikuar.