Durrës: Shërbim Punësimi për të Rinjtë pranë Zyrës së Punësimit

Wednesday, 07 December 2011 16:02

Bitro: Shërbimi do të rrisë punësimin e të rinjve

Drejtoria Rajonale e Shërbimit Kombëtar të Punësimit Durrës, më 7 Dhjetor 2011, promovoi fillimin e funksionimit të Shërbimit të Punësimit të të Rinjve (ShPR) pranë Zyrës së Punësimit Durrës. Themelimi i qendrave të punësimit dhe këshillimit u përgjigjet prioriteteve kombëtare të Qeverisë të parashtruara në Strategjinë dhe Planin e Veprimit për Rininë, ku parashikohet krijimi i një rrjeti qendrash rinore multi-funksionale në të gjithë prefekturat e vendit.
Për këtë qëllim, UNICEF - në kuadër të Programit të Punësimit dhe Migrimit të Rinisë (YEM), që mundësoi ngritjen e ShPR në Shkodër dhe Kukës - me kërkesë të Ministrisë së Punës, Çështjeve Sociale dhe Shanseve të Barabarta mbështeti rritjen dhe forcimin e shërbimeve egzistuese të punësimit në Fier, Durrës dhe Elbasan.
ShPR/YES është krijuar për të qenë zhvillues dhe edukues si për individin ashtu edhe për komunitetin. ShPR/YES ofron njohuri, informacion dhe aftësi. Komponentë të rëndësishëm janë krijimi i rrjeteve dhe organizimi i veprimtarive për komunitetin. Vëmendje e veçantë i jepet përkufizimit të punës që është e dëmshme për shëndetin dhe zhvillimin normal të të rinjve, si dhe kufizimeve për shkak të moshës dhe kalimit nga punësimi jo-formal në atë formal.

Shërbimi i Punësimit të të Rinjve siguron:

Lajmërime për punë, panaire punësimi, vlerësime dhe udhëzime për karrierën, mundësi për arsimim profesional;
Këshillim individual për punësim të të rinjve të moshave 16 deri 29 vjeç;
Shërbime për punësim, mundësi stazhi dhe punësimi sezonal;
Paketa informative për punësimin dhe arsimimin e të rinjve, ku përfshihen orientimi dhe burime informacioni;
Hartimin e CV-së, përgatitjen dhe planifikimin për punësim dhe seminare.
ShPR/YES përfshin këshillime për:
Informacionin për të drejtat dhe kontratat e punës;
Shëndetin dhe sigurinë në punë;
Çfarë nuk duhet të bëjnë të rinjtë;
Informacion për lëvizjen e sigurt (e lidhur me migrimin).

Në shërbimet e punësimit në Durrës marrin shërbime 60-80 persona në ditë, 35% e të cilëve i përkasin moshës 16-29 vjeç, grup që është objekt i këtij programi. Tanimë Shqipërisë iu bë i mundur liberalizimi i vizave në vendet e zonës Shengen, Shërbimi i Punësimit të të Rinjve do t’u japë informacion të rinjve edhe mbi lëvizjen e sigurt, të drejtat dhe detyrimet e qytetarëve që planifikojnë të udhëtojnë në vendet e BE-së.
Në promovimin e këtij shërbimi të ri morën pjesë dhe përshëndetën edhe përfaqësues të UNICEF, Ministrisë së Punës, Çështjeve Sociale dhe Shanseve të Barabarta, përfaqësuesit më të lartë të Qarkut Durrës. Drejtori i Kabinetit të Ministrit të Punës, z.Kleves Bitro, theksoi rëndësinë e këtij shërbimi dhe ndikimin e tij në rritjen e punësimit të të rinjve dhe garantimit të punës së denjë për ta.