Ministria e Punës përshëndet vendimin e ERE për të mosrritur çmimin e energjisë në tre vitet në vazhdim

Friday, 16 December 2011 11:40

Ksera: ERE respektoi vendim e Keshillit Kombëtar të Punës
Ministria e Punës, Çështeve Sociale dhe Shanseve të Barabarta përshëndet vendimin e djeshëm të Bordit drejtues të Entit Rregullator të Energjisë për të mos ndryshuar çmimin e energjisë elektrike për tre vitet e ardhshme.

Ky vendim i ERE respekton, ndër të tjera, vendimin e Këshillit Kombëtar të Punës si organi më i lartë konsultativ tripalësh për mos aplikimin e tarifave të reja të energjisë.

Vendimi vjen në zbatim të marrëveshjes së nënshkruar mes Qeverisë shqiptare dhe Sindikatave të Pavarura të Shqipërisë dhe Marrëveshjes që ka Ministria e Punës me punëdhënësit dhe punëmarrësit, për mbrojtjen e shtresave në nevojë dhe garantimin e kushteve lehtësuese për biznesin.

Prioritet i Qeverisë është ulja e varfërisë dhe mbrojtja e shtresave në nevojë si dhe garantimi dhe sigurimi i të gjithë konsulatorëve në kushte të vështira social-ekonomike, ku përfshihen:

familjet të cilat trajtohen me ndihmë ekonomike apo që kanë në përbërje të tyre anëtarë me aftësi të kufizuara;
pensionistët kryefamiljarë;
si dhe familjet e punonjësve buxhetor, me pagë mujore bruto nën 35 mijë lekë në muaj,

Këto kategori do të vazhdojnë të përfitojnë, ashtu si deri tani, kompesimin në vlerën e 640 lekëve në muaj, bazuar në Vendimit të Qeverisë “Për mbrojtjen e shtresave në nevoje, nga rritja e çmimit të energjise elektrike”.

Ministria e Punës garanton thellimin e bashkëpunimit me partnerët socialë për të plotësuar çdo kërkesë legjitime dhe që vjen në mbështetje të kategorive në nevojë.